Last Updated on 16 Aug 2026 • 4:27 AM by Openzone Online
ചെറുതോണി : ഭരണപരമായ കാര്യങ്ങൾ കൂടുതൽ എളുപ്പമാക്കുക എന്ന ലക്ഷ്യത്തോടെ പൈനാവ് ഡി-33 ക്വാർട്ടേഴ്സിൽ പ്രവർത്തിക്കേണ്ടിയിരുന്ന ഇടുക്കി പൊലീസ് സർക്കിൾ ഇൻസ്പെക്ടറുടെ കാര്യാലയം വഞ്ചിക്കവലയിലേക്ക് മാറ്റാനുള്ള നീക്കം പുരോഗമിക്കുന്നു. വഞ്ചിക്കവല കെ.എസ്.ഇ.ബിയുടെ ഉടമസ്ഥതയിലുള്ള സി-6 കെട്ടിടത്തിൽ സി.ഐ ഓഫീസിന്റെ ബോർഡും സ്ഥാപിച്ചു. എന്നാൽ ഓഫീസ് പ്രവർത്തനം ആരംഭിക്കുമെന്ന് പ്രഖ്യാപിച്ചിട്ടും സ്റ്റാഫ് ക്രമീകരണം ഉൾപ്പെടെയുള്ള കാര്യങ്ങളിൽ വ്യക്തതയില്ലാത്തത് ചർച്ചയാകുകയാണ്.
യു.ഡി.എഫ് നേതൃത്വത്തിലുള്ള പുതിയ ഭരണസംവിധാനം അധികാരത്തിലെത്തിയതോടെ സബ് ഇൻസ്പെക്ടർമാർക്ക് വീണ്ടും പൊലീസ് സ്റ്റേഷൻ ചുമതല നൽകുകയും സി.ഐമാരിൽ നിന്ന് സ്റ്റേഷൻ ചുമതല ഒഴിവാക്കി അവർക്ക് പ്രത്യേക ഓഫീസ് സംവിധാനം ഒരുക്കുകയും ചെയ്യണമെന്ന തീരുമാനത്തിന്റെ ഭാഗമായാണ് പുതിയ ക്രമീകരണം. അതേസമയം, ചില പ്രാദേശിക രാഷ്ട്രീയ നേതാക്കളുടെ താൽപര്യപ്രകാരമാണ് സി.ഐ ഓഫീസ് പൈനാവിൽ നിന്ന് വഞ്ചിക്കവലയിലേക്ക് മാറ്റുന്നതെന്ന ആരോപണവും ഉയർന്നിരുന്നു.
എന്നാൽ മരിയാപുരം, കഞ്ഞിക്കുഴി, വാഴത്തോപ്പ് മേഖലകളിൽ നിന്നുള്ള സാധാരണക്കാർക്ക് കൂടുതൽ എളുപ്പത്തിൽ എത്തിച്ചേരാനും നിയമപരമായ സഹായം ലഭ്യമാക്കാനും വഞ്ചിക്കവലയാണ് കൂടുതൽ അനുയോജ്യമെന്നതാണ് പൊലീസ് വൃത്തങ്ങളുടെ വിശദീകരണം. പൈനാവ് എൻജിനീയറിങ് കോളേജിൽ അടുത്തിടെ ഉണ്ടായ സംഘർഷങ്ങളുടെ പശ്ചാത്തലത്തിൽ, കളക്ടറേറ്റ് ഉൾപ്പെടുന്ന പൈനാവ് മേഖലയിൽ തന്നെ സി.ഐയുടെ സാന്നിധ്യം കൂടുതൽ പ്രയോജനകരമാകുമെന്ന അഭിപ്രായവും പൈനാവിലെ പൊതുപ്രവർത്തകർ മുന്നോട്ടുവയ്ക്കുന്നു.
അതേസമയം ചെറുതോണി പൊലീസ് സ്റ്റേഷനോട് ചേർന്ന് തന്നെ സി.ഐ ഓഫീസ് പ്രവർത്തിക്കുന്നതാണ് കൂടുതൽ യുക്തിസഹമെന്ന അഭിപ്രായവും ശക്തമാണ്. ജില്ലാ പൊലീസ് ആസ്ഥാനത്തോട് ചേർന്ന് പൊലീസ് മേധാവിയുടെ ഓഫീസ് ഉൾപ്പെടെയുള്ള സൗകര്യങ്ങളോടുകൂടിയ ബഹുനില കെട്ടിടം നിർമിക്കാനും ധാരണയായ സാഹചര്യത്തിൽ, ഭാവിയിൽ പൊലീസ് ഭരണസംവിധാനങ്ങൾ ചെറുതോണി കേന്ദ്രീകരിച്ച് കൂടുതൽ ഏകോപിതമാകുമെന്ന വിലയിരുത്തലുമുണ്ട്.
ഇടുക്കിയിൽ നേരത്തെ സബ് ഇൻസ്പെക്ടറായി സേവനമനുഷ്ഠിച്ച ടി.സി. മുരുകനെ പുതിയ സർക്കിൾ ഇൻസ്പെക്ടറായി നിയമിച്ച് ഉത്തരവിറങ്ങിയിരുന്നു. എന്നാൽ പ്രാദേശിക തലത്തിൽ ഉയർന്നുവരുന്ന താൽപര്യങ്ങളും ഇടപെടലുകളും കാരണം മുരുകന്റെ നിയമനം തന്നെ മാറിയേക്കാമെന്ന സൂചനകളും പുറത്തുവരുന്നുണ്ട്. പകരം മറ്റൊരു സി.ഐയെ ഇവിടെ നിയമിക്കുമെന്ന അഭ്യൂഹവും ശക്തമാണ്. ഇക്കാര്യത്തിൽ ഔദ്യോഗിക സ്ഥിരീകരണം ലഭിച്ചിട്ടില്ല.ആഗസ്റ്റ് 15 മുതൽ പുതിയ സർക്കിൾ ഓഫീസ് പ്രവർത്തനം ആരംഭിക്കുമെന്നായിരുന്നു നേരത്തെയുള്ള അറിയിപ്പ്.
എന്നാൽ ഓഫീസ് തുടങ്ങിയോ, ആരാണ് ചുമതലയേൽക്കുക, എത്ര ജീവനക്കാരുണ്ടാകും തുടങ്ങിയ അടിസ്ഥാന കാര്യങ്ങളിൽ പോലും ഇതുവരെ പൂർണമായ വ്യക്തതയില്ല.ഇതിനിടെയാണ് മറ്റൊരു പരിഹാസ്യമായ സാഹചര്യം കൂടി ചർച്ചയാകുന്നത്. സി.ഐയായി സേവനം ചെയ്തിരുന്ന പല ഉദ്യോഗസ്ഥർക്കും പുതിയ നിയമനം ലഭിക്കാതെ ചൂണ്ടയിട്ട് ഇരിക്കേണ്ട അവസ്ഥയാണെന്നാണ് നാട്ടുകാരുടെ പരിഹാസം. ഓഫീസിന് സ്ഥലം കണ്ടെത്തിയെങ്കിലും ഓഫീസർമാരെയും സ്റ്റാഫിനെയും കണ്ടെത്താൻ കഴിയാത്ത അവസ്ഥയാണോ എന്ന ചോദ്യവും ഉയരുന്നു.സംസ്ഥാനത്ത് ലഹരിക്കെതിരെ ഓപ്പറേഷൻ തൂഫാൻ ശക്തമായി മുന്നേറുന്ന സാഹചര്യത്തിൽ, പൊലീസ് സംവിധാനത്തിലെ ഒഴിവുകളും ചുമതലകളിലെ അനിശ്ചിതത്വവും അടിയന്തരമായി പരിഹരിക്കണമെന്നാണ് പൊതുപ്രവർത്തകരുടെ ആവശ്യം.
ക്രമസമാധാന പാലനത്തിനും ലഹരിവിരുദ്ധ നടപടികൾക്കും ആവശ്യമായ ഉദ്യോഗസ്ഥരെ കൃത്യമായി നിയോഗിച്ച് ഏകോപിപ്പിക്കാൻ സർക്കാർ അടിയന്തര നടപടി സ്വീകരിക്കണമെന്നും അവർ ആവശ്യപ്പെടുന്നു.ഓഫീസ് വഞ്ചിക്കവലയിലായാലും പൈനാവിലായാലും ചെറുതോണിയിലായാലും ജനങ്ങൾക്ക് വേണ്ടത് ഒറ്റ കാര്യമാണ് — പൊലീസ് സംവിധാനം കൃത്യമായി പ്രവർത്തിക്കണം. ഓഫീസിന്റെ സ്ഥലം സംബന്ധിച്ച തർക്കങ്ങൾക്കപ്പുറം, ചുമതലയുള്ള ഉദ്യോഗസ്ഥരും ആവശ്യമായ സ്റ്റാഫും ഉടൻ നിയോഗിക്കപ്പെടണമെന്നതാണ് പൊതുവായ ആവശ്യം.
