എംഡി എം എയുമായി പിടിയിലായ യൂത്ത് കോൺഗ്രസ് പ്രവർത്തകൻ മുഹമ്മദ് ഹുസൈനെ ടീം വി.ഡി. സതീശൻ പേജിന്റെ കോഡിനേറ്റർ സ്ഥാനത്തുനിന്നും നീക്കി. ഓപ്പറേഷൻ തൂഫാൻ നടപടിയിലാണ് ഇയാൾ പിടിയിൽ ആയത്.

Last Updated on 12 Aug 2026 • 3:43 AM by Openzone Online

പെരുമ്പാവൂർ: ഏഴുലക്ഷം രൂപയോളം വിലവരുന്ന 139 ഗ്രാം എംഡിഎംഎയുമായി കാസർകോട് ചെന്തേര പൊലീസ് പിടികൂടിയ സംഘത്തിലെ ഒരാൾക്ക് പെരുമ്പാവൂരിലെ കോൺഗ്രസ് നേതൃത്വവുമായി അടുത്ത ബന്ധമുണ്ടായിരുന്നുവെന്ന വിവരങ്ങൾ പുറത്തുവന്നു. അറയ്ക്കപ്പടി സ്വദേശി കെ.എച്ച്. മുഹമ്മദ് ഹുസൈൻ ടീം വി.ഡി. സതീശൻ എന്ന സാമൂഹികമാധ്യമ പേജിന്റെ കോഡിനേറ്ററായും പ്രതിപക്ഷ നേതാവ് വി.ഡി. സതീശന്റെ അടുത്തയാളെന്ന നിലയിലും പ്രദേശത്തെ കോൺഗ്രസ് പ്രവർത്തകർക്കിടയിൽ അറിയപ്പെട്ടിരുന്നുവെന്നാണ് വിവരം.

വെങ്ങോലയിൽ പൊതുപരിപാടിയിൽ പങ്കെടുക്കാനെത്തിയ വി.ഡി. സതീശൻ മുഹമ്മദ് ഹുസൈന്റെ വീട് സന്ദർശിച്ചതിന് പിന്നാലെയാണ് ഇയാൾക്ക് പ്രാദേശിക കോൺഗ്രസ് പ്രവർത്തകർക്കിടയിൽ കൂടുതൽ പരിചിതത്വം ലഭിച്ചതെന്നാണ് പറയപ്പെടുന്നത്. പിണറായി വിജയന്റെ നേതൃത്വത്തിൽ നടന്ന നവകേരള സദസ്സിനെതിരായ പ്രതിഷേധവുമായി ബന്ധപ്പെട്ട് മുഹമ്മദ് ഹുസൈനെതിരെ പൊലീസ് നടപടി ഉണ്ടായിരുന്നതായും വിവരമുണ്ട്.

കോൺഗ്രസ് പ്രവർത്തനങ്ങളിൽ സജീവമായിരുന്നുവെന്ന് സൂചിപ്പിക്കുന്ന മറ്റൊരു വിവരവും പുറത്തുവന്നിട്ടുണ്ട്. 2015 ഒക്ടോബറിൽ യൂത്ത് കോൺഗ്രസ് വെങ്ങോല വലിയകുളം യൂണിറ്റ് സംഘടിപ്പിച്ച ലഹരിക്കെതിരെ നാടുണരുന്നു എന്ന പ്രഭാതനടത്തം പരിപാടിയിൽ മുഹമ്മദ് ഹുസൈൻ ജാഥാ ക്യാപ്റ്റനായിരുന്നുവെന്നാണ് ലഭിക്കുന്ന വിവരം.

139 ഗ്രാം എംഡിഎംഎയുമായി മുഹമ്മദ് ഹുസൈൻ (28), പി.എ. അബ്ദുൾ സലാം (27), പി.എ. അബ്ബാസ് (50) എന്നിവരെയാണ് കഴിഞ്ഞയാഴ്ച കാസർകോട് ചെന്തേര പൊലീസ് അറസ്റ്റ് ചെയ്തത്. തുടർന്ന് സംഘത്തിലെ മറ്റൊരു കൂട്ടാളിയായ സൈനുൾ ആബുദീൻ (42) പെരുമ്പാവൂരിൽനിന്നും പിടിയിലായതായി പൊലീസ് അറിയിച്ചു.

അറസ്റ്റിന് പിന്നാലെ മുഹമ്മദ് ഹുസൈനെ യൂത്ത് കോൺഗ്രസ് വലിയകുളം മേഖല പ്രസിഡന്റ് സ്ഥാനത്തുനിന്ന് ജില്ലാ പ്രസിഡന്റ് നീക്കം ചെയ്തതായും വിവരമുണ്ട്. മയക്കുമരുന്ന് കേസിൽ പ്രതിയായ വ്യക്തിക്ക് രാഷ്ട്രീയ ബന്ധങ്ങളുണ്ടെന്ന വിവരം പുറത്തുവന്നതോടെ സംഭവത്തിൽ കൂടുതൽ അന്വേഷണം വേണമെന്ന ആവശ്യവും ഉയർന്നിട്ടുണ്ട്.