Last Updated on 22 Jun 2026 • 2:00 PM by Openzone Online
ചെറുതോണി: സംസ്ഥാന സർക്കാരിന്റെ പുതിയ ബജറ്റ് ഇടുക്കി ജില്ലയെ പൂർണമായും അവഗണിക്കുന്നതാണെന്നും വികസന മുരടിപ്പിലേക്ക് നയിക്കുന്നതാണെന്നും സിപിഐ എം ജില്ലാ സെക്രട്ടറി സി.വി. വർഗീസ് ആരോപിച്ചു.
വ്യക്തമായ വികസന പദ്ധതികളോ ആവശ്യമായ ധനവിനിയോഗമോ ഇല്ലാത്ത ബജറ്റാണിതെന്നും അദ്ദേഹം വാർത്താക്കുറിപ്പിൽ പറഞ്ഞു.
പ്രധാന ആരോപണങ്ങൾ
▶ ഇടുക്കി മെഡിക്കൽ കോളജിന് പ്രത്യേക വിഹിതമില്ലഇടുക്കി മെഡിക്കൽ കോളജിന്റെ വികസനത്തിനോ അടിസ്ഥാന സൗകര്യ വികസനത്തിനോ പ്രത്യേക തുക അനുവദിച്ചിട്ടില്ല. എൽഡിഎഫ് സർക്കാർ 600 കോടി രൂപ ചെലവഴിച്ച് മെഡിക്കൽ കോളജിനെ ഉയർത്തിക്കൊണ്ടുവന്ന സാഹചര്യത്തിൽ പുതിയ പദ്ധതികൾ പ്രഖ്യാപിക്കാത്തത് ജനങ്ങളോടുള്ള അവഗണനയാണെന്ന് സിപിഐ എം ആരോപിച്ചു.
▶ ആരോഗ്യ മേഖലയ്ക്ക് തിരിച്ചടിജില്ലാ ആശുപത്രികൾ, താലൂക്ക് ആശുപത്രികൾ, പ്രാഥമിക ആരോഗ്യ കേന്ദ്രങ്ങൾ എന്നിവയുടെ നിർമാണ പ്രവർത്തനങ്ങൾ തുടരാൻ ആവശ്യമായ ഫണ്ട് ബജറ്റിൽ ഉൾപ്പെടുത്തിയിട്ടില്ല. ഉടുമ്പൻചോല ആയുർവേദ മെഡിക്കൽ കോളജിനും പ്രത്യേക വിഹിതമില്ല.
▶ വിദ്യാഭ്യാസ മേഖലയിലും നിരാശസർക്കാർ കോളജുകളുടെയും ഹയർ സെക്കൻഡറി സ്കൂളുകളുടെയും നിലവിലെ നിർമാണ പ്രവർത്തനങ്ങൾ മുന്നോട്ട് കൊണ്ടുപോകാൻ ആവശ്യമായ തുക ബജറ്റിൽ അനുവദിച്ചിട്ടില്ലെന്ന് സിപിഐ എം ചൂണ്ടിക്കാട്ടി.
▶ ടൂറിസം മേഖലയ്ക്ക് അവഗണനമൂന്നാർ, തേക്കടി, വാഗമൺ, ഇടുക്കി തുടങ്ങിയ പ്രധാന വിനോദസഞ്ചാര കേന്ദ്രങ്ങൾ ഉൾപ്പെടുന്ന ജില്ലയ്ക്ക് ടൂറിസം വികസനത്തിനായി പ്രത്യേക പദ്ധതികളോ ഫണ്ട് വിഹിതമോ ഇല്ലെന്ന് വിമർശനം.
▶ റോഡ് വികസനത്തിന് ഫണ്ടില്ലഇടുക്കിയിലെ റോഡുകളുടെ ശോചനീയാവസ്ഥ പരിഹരിക്കുമെന്ന് യുഡിഎഫ് വാഗ്ദാനം ചെയ്തിരുന്നെങ്കിലും ബജറ്റിൽ റോഡ് വികസനത്തിന് ആവശ്യമായ തുക നീക്കിവച്ചിട്ടില്ലെന്ന് സിപിഐ എം ആരോപിച്ചു.
▶ കട്ടപ്പന–കമ്പം തുരങ്കപാത പദ്ധതിക്ക് തിരിച്ചടിഎൽഡിഎഫ് സർക്കാർ സാധ്യതാ പഠനത്തിനായി അനുവദിച്ചിരുന്ന 10 കോടി രൂപ പോലും ഒഴിവാക്കിയതിലൂടെ കട്ടപ്പന–കമ്പം തുരങ്കപാത പദ്ധതിയെ ഉപേക്ഷിക്കാനുള്ള നീക്കമാണ് നടക്കുന്നതെന്ന് ആരോപണം.
▶ ഭൂ പ്രശ്നങ്ങളിൽ വ്യക്തതയില്ലകുടിയേറ്റ മേഖലയിലെ ഭൂ പ്രശ്നങ്ങൾ പരിഹരിക്കാൻ ആവശ്യമായ നിയമ ഭേദഗതികളോ സമയബന്ധിത നടപടികളോ ബജറ്റിൽ വ്യക്തമാക്കിയിട്ടില്ല. നിലവിലുള്ള നിയമ, ചട്ട പരിഷ്കാരങ്ങൾ ദുർബലപ്പെടുത്താനുള്ള ശ്രമമാണ് നടക്കുന്നതെന്നും സിപിഐ എം ആരോപിച്ചു.
▶ വന്യജീവി ആക്രമണങ്ങൾ തടയാൻ പ്രത്യേക പദ്ധതി ഇല്ലവന്യജീവി ആക്രമണത്തിൽ മനുഷ്യജീവൻ നഷ്ടപ്പെടുകയും കൃഷിനാശം സംഭവിക്കുകയും ചെയ്യുന്ന സാഹചര്യത്തിലും ജില്ലയ്ക്ക് പ്രത്യേക പാക്കേജോ നഷ്ടപരിഹാര വർധനയോ പ്രഖ്യാപിച്ചിട്ടില്ല. ചികിത്സാ സഹായം, പുനരധിവാസം, കൃഷിനാശ നഷ്ടപരിഹാരം എന്നിവ സംബന്ധിച്ചും ബജറ്റിൽ പരാമർശമില്ലെന്ന് വിമർശനം.
ജനപ്രതിനിധികൾക്കെതിരെയും വിമർശനംജില്ലയിൽ നിന്നുള്ള യുഡിഎഫ് എംഎൽഎമാർ സർക്കാരിനോട് ശക്തമായ നിലപാട് സ്വീകരിക്കുന്നില്ലെന്നും ഇടുക്കിയുടെ വികസന ആവശ്യങ്ങൾ ഉന്നയിക്കുന്നതിൽ പരാജയപ്പെട്ടുവെന്നും സിപിഐ എം ജില്ലാ സെക്രട്ടറി ആരോപിച്ചു.
ഇടുക്കി ജില്ലയുടെ വികസന ആവശ്യങ്ങൾ അവഗണിക്കുന്ന ബജറ്റിനെതിരെ ജനങ്ങൾ ശക്തമായി പ്രതിഷേധിക്കണമെന്നും സിപിഐ എം ആഹ്വാനം ചെയ്തു.
