Last Updated on 21 Jun 2026 • 9:27 AM by Openzone Online
ചെറുതോണി: രാജ്യത്ത് 11 വർഷത്തിനിടയിലെ ഏറ്റവും ദുർബലമായ മൺസൂൺ സീസൺ അനുഭവപ്പെടുമെന്ന കേന്ദ്ര കാലാവസ്ഥാ വകുപ്പിന്റെ മുന്നറിയിപ്പിനിടെ, ഇടുക്കി ജില്ലയിലെ പല മേഖലകളിലും മഴയുടെ കടുത്ത കുറവ് ആശങ്ക ഉയർത്തുന്നു. എൽ നിനോ പ്രതിഭാസത്തിന്റെ സ്വാധീനമാണ് ഇത്തവണ മൺസൂൺ ദുർബലമാകാൻ പ്രധാന കാരണമെന്നാണ് കാലാവസ്ഥാ വിദഗ്ധരുടെ വിലയിരുത്തൽ.
രാജ്യത്തെ മൊത്തം മഴ ദീർഘകാല ശരാശരിയുടെ 90 ശതമാനത്തോളം മാത്രമാകുമെന്നാണ് പ്രവചനം. കാലവർഷം കേരളത്തിലെത്തിയെങ്കിലും പ്രതീക്ഷിച്ച രീതിയിൽ മഴ ലഭിക്കാത്ത അവസ്ഥയാണ് പല മേഖലകളിലും. ചെറുതോണി ഉൾപ്പെടെയുള്ള ഇടുക്കി ജില്ലയിലെ നിരവധി പ്രദേശങ്ങളിൽ കഴിഞ്ഞ ദിവസങ്ങളായി കാര്യമായ മഴ ലഭിച്ചിട്ടില്ല. മേഘാവൃതമായ അന്തരീക്ഷം രൂപപ്പെടുന്നുണ്ടെങ്കിലും മഴ പെയ്യാതെ മാറിപ്പോകുന്നതാണ് പതിവ് കാഴ്ച.
ഭൂമധ്യരേഖാ പസഫിക് സമുദ്രത്തിൽ രൂപപ്പെടുന്ന എൽ നിനോ പ്രതിഭാസം ഇന്ത്യൻ മൺസൂണിനെ ദുർബലപ്പെടുത്തുന്ന പ്രധാന ഘടകമാണ്. എൽ നിനോ ശക്തമാകുമ്പോൾ ഇന്ത്യൻ ഉപഭൂഖണ്ഡത്തിലേക്കുള്ള ഈർപ്പമുള്ള കാറ്റിന്റെ പ്രവാഹം കുറയുകയും മഴ മേഘങ്ങളുടെ രൂപീകരണം ദുർബലമാകുകയും ചെയ്യുന്നു. ഇതാണ് ഇത്തവണയും സംഭവിക്കുന്നതെന്നാണ് കാലാവസ്ഥാ നിരീക്ഷണങ്ങൾ സൂചിപ്പിക്കുന്നത്.
ഇതിന് പുറമെ വടക്കേ ഇന്ത്യയെ ബാധിക്കുന്ന പടിഞ്ഞാറൻ കാലാവസ്ഥാ വ്യതിയാനങ്ങളും മൺസൂൺ പ്രവാഹത്തിന്റെ മുന്നേറ്റം മന്ദഗതിയിലാക്കിയതായി റിപ്പോർട്ടുകളുണ്ട്. രാജ്യത്തിന്റെ വിവിധ ഭാഗങ്ങളിൽ ജൂൺ മാസത്തിലെ മഴ ശരാശരിയേക്കാൾ ഗണ്യമായി കുറഞ്ഞതായും റിപ്പോർട്ടുകൾ വ്യക്തമാക്കുന്നു. ഇടുക്കി പോലുള്ള കാർഷിക ജില്ലകളിൽ മഴക്കുറവ് കൂടുതൽ പ്രത്യാഘാതങ്ങൾ സൃഷ്ടിക്കുമെന്ന ആശങ്ക ഉയരുന്നുണ്ട്. ഏലം, കുരുമുളക്, കാപ്പി, വാഴ എന്നിവ ഉൾപ്പെടെയുള്ള കൃഷികൾ മഴയെ ആശ്രയിച്ചാണ് മുന്നോട്ടുപോകുന്നത്.
മഴ വൈകുന്നതും കുറയുന്നതും ഉൽപാദനത്തെയും കർഷകരുടെ ചെലവിനെയും നേരിട്ട് ബാധിക്കുമെന്നാണ് വിലയിരുത്തൽ. കാലവർഷം കലണ്ടറിൽ എത്തിയെങ്കിലും ഇടുക്കിയിൽ ഇപ്പോഴും അനുഭവപ്പെടുന്നത് വേനൽക്കാലമാണ് എന്നതാണ് പ്രദേശവാസികളുടെ പ്രതികരണം. വരും ആഴ്ചകളിൽ ശക്തമായ മഴ ലഭിക്കാത്ത പക്ഷം കാർഷിക മേഖലയിലും ജലസ്രോതസ്സുകളിലും പ്രതിസന്ധി രൂക്ഷമാകുമെന്ന ആശങ്ക ശക്തമാകുകയാണ്.
