ഇടുക്കി-തങ്കമണി- നാലുമുക്ക് റോഡിൽ പാണ്ടിപ്പാറയിലെ എസ് വളവ് അപകടക്കെണിയാകുന്നു. പരാതികൾ നൽകിയിട്ടും നടപടിയില്ലെന്ന് നാട്ടുകാർ.വിഷയത്തിൽ സർക്കാർ അടിയന്തരമായി ഇടപെട്ട് പ്രശ്നത്തിന് പരിഹാരം കാണണമെന്ന് പ്രദേശവാസികൾ.

Last Updated on 29 Oct 2026 • 8:05 AM by Openzone Online

ചെറുതോണി: ഇടുക്കി–തങ്കമണി-നാലുമുക്ക് റോഡിൽ പാണ്ടിപ്പാറയ്ക്ക് സമീപമുള്ള എസ് വളവ് വാഹനയാത്രക്കാർക്ക് അപകടഭീഷണിയാകുന്നു. റോഡിന്റെ വീതിക്കുറവും റോഡിന്റെ ഘടനയിലുള്ള വ്യത്യാസങ്ങളും ചരിവും ഉൾപ്പെടെയുള്ള കാരണങ്ങളാൽ ഇവിടെ വാഹനാപകടങ്ങൾ പതിവാകുന്നതായി പ്രദേശവാസികൾ പറയുന്നു.

ഇരുചക്രവാഹനങ്ങൾ മുതൽ സ്വകാര്യ ബസുകൾ വരെയുള്ള വാഹനങ്ങൾ ഇവിടെ അപകടത്തിൽപ്പെടുകയും മറ്റു വാഹനങ്ങളുമായി കൂട്ടിയിടികൾ ഉണ്ടാകുകയും ചെയ്തിട്ടുണ്ട്.
റോഡിലെ അപകടസാധ്യത പരിഹരിക്കണമെന്നാവശ്യപ്പെട്ട് പ്രദേശവാസികൾ പൊതുമരാമത്ത് വകുപ്പിനും ബന്ധപ്പെട്ട മന്ത്രിക്കും ഉൾപ്പെടെ പരാതികൾ നൽകിയിട്ടും ഫലപ്രദമായ നടപടികൾ ഉണ്ടായിട്ടില്ലെന്നാണ് നാട്ടുകാരുടെ ആരോപണം.

2018-ൽ നിർമാണപ്രവൃത്തികൾ ആരംഭിച്ച ഈ റോഡ് സെൻട്രൽ റോഡ് ഫണ്ട് പദ്ധതിയുടെ ഭാഗമായി, ജോയ്സ് ജോർജ് എം.പി. ആയിരുന്ന കാലത്താണ് വികസിപ്പിച്ചത്. എന്നാൽ റോഡിന്റെ വികസനപ്രവൃത്തികൾ നടന്നിട്ടും പാണ്ടിപ്പാറയ്ക്ക് സമീപത്തെ ഈ വളവിലെ അപകടസാധ്യതയ്ക്ക് ശാശ്വത പരിഹാരം ഉണ്ടായിട്ടില്ലെന്നാണ് നാട്ടുകാരുടെ പരാതി.
വലിയൊരു ദുരന്തം സംഭവിച്ചതിനുശേഷം മാത്രം അധികൃതർ ഇടപെടുന്ന സാഹചര്യം ഒഴിവാക്കണമെന്നാണ് പ്രദേശവാസികളുടെ ആവശ്യം. റോഡിന്റെ ഘടനയും വീതിയും ചരിവും സാങ്കേതികമായി പരിശോധിച്ച് അപകടസാധ്യതകൾ വിലയിരുത്തണമെന്നും ആവശ്യമായിടത്ത് റോഡ് വീതികൂട്ടൽ, വളവിന്റെ സുരക്ഷ മെച്ചപ്പെടുത്തൽ, മുന്നറിയിപ്പ് ബോർഡുകൾ, റോഡ് മാർക്കിങ്ങുകൾ, മറ്റ് സുരക്ഷാ സംവിധാനങ്ങൾ എന്നിവ അടിയന്തരമായി ഒരുക്കണമെന്നും നാട്ടുകാർ ആവശ്യപ്പെടുന്നു.