Last Updated on 23 Oct 2026 • 3:13 AM by Openzone Online
ചെറുതോണി: മഴ പെയ്തതോടെ ഗിരിജ്യോതിപ്പടി–ഗിരിജ്യോതി സ്കൂൾ റോഡിലൂടെയുള്ള യാത്ര കുട്ടികൾക്ക് ദുരിതമായി. വാഴത്തോപ്പ് പഞ്ചായത്തിലെ ഒമ്പതാം വാർഡിൽ ഉൾപ്പെടുന്ന റോഡ് തകർന്നുകിടക്കുന്നതിനാൽ മഴവെള്ളവും ചെളിയും നിറഞ്ഞ ഭാഗങ്ങളിലൂടെ ചവിട്ടിയാണ് കുട്ടികൾ സ്കൂളിലേക്ക് പോകുന്നത്.
റോഡിലെ വെള്ളക്കെട്ടിലൂടെ ഒരു കുട്ടി അതിസാഹസികമായി നടന്നുനീങ്ങുന്ന ദൃശ്യങ്ങൾ നാട്ടുകാരുടെ ആശങ്ക വർധിപ്പിക്കുന്നു. ചെളിവെള്ളത്തിലൂടെ നടന്നുപോകുമ്പോൾ കുട്ടികളുടെ സോക്സും യൂണിഫോമും നനയുന്ന അവസ്ഥയാണ്. നനഞ്ഞ വസ്ത്രങ്ങളുമായി വൈകുന്നേരം വരെ ക്ലാസിലിരിക്കേണ്ടിവരുന്നത് കുട്ടികൾക്ക് വലിയ ബുദ്ധിമുട്ടാണ്.
റോഡിന്റെ ശോച്യാവസ്ഥ പരിഹരിക്കണമെന്ന ആവശ്യം ഉയർന്നിട്ടും നടപടിയുണ്ടാകുന്നില്ലെന്നാണ് നാട്ടുകാരുടെ പരാതി. ഗിരിജ്യോതി സ്കൂളിലേക്കുൾപ്പെടെ നിരവധി കുട്ടികൾ ആശ്രയിക്കുന്ന റോഡിന്റെ ദുരവസ്ഥ നേരത്തെയും വാർത്തകളിൽ ഇടംപിടിച്ചിരുന്നു. എന്നിട്ടും പ്രശ്നത്തിന് ശാശ്വത പരിഹാരമുണ്ടായിട്ടില്ലെന്നാണ് പ്രദേശവാസികൾ പറയുന്നത്. എട്ട്, ഒമ്പത് വാർഡുകളിലെ ജനപ്രതിനിധികളുടെ ശ്രദ്ധയിൽ വിഷയം കൊണ്ടുവന്നിട്ടും ആവശ്യമായ ഇടപെടലുണ്ടാകുന്നില്ലെന്നും ആക്ഷേപമുണ്ട്.
റോഡിലൂടെ സഞ്ചരിക്കുന്ന ജനങ്ങളോടും നാട്ടുകാരോടും വാഴത്തോപ്പ് പഞ്ചായത്ത് അവഗണന കാട്ടുകയാണെന്ന വിമർശനവും ഉയരുന്നുണ്ട്. കുട്ടികളുടെ സുരക്ഷയും പഠനസാഹചര്യവും പരിഗണിച്ച് റോഡിലെ വെള്ളക്കെട്ടും കുഴികളും അടിയന്തരമായി പരിഹരിക്കാൻ പഞ്ചായത്ത് അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം. ഓരോ മഴയിലും കുട്ടികൾക്ക് ഇതേ ദുരിതം ആവർത്തിക്കേണ്ടിവരുന്ന സാഹചര്യം ഒഴിവാക്കാൻ ബന്ധപ്പെട്ട അധികൃതർ അടിയന്തരമായി ഇടപെടുമോയെന്നാണ് ഇനി അറിയേണ്ടത്.
