ഇസ്രായേലിൽ നിരവധി തൊഴിൽ അവസരങ്ങൾ: സ്ത്രീകൾക്കും പുരുഷന്മാർക്കും അവസരം. വാഹനങ്ങളുടെ ഡെന്റ് വർക്ക് സ്പ്രേ പെയിന്റർ തസ്തികളിൽ മുസ്ലിം ഉദ്യോഗാർത്ഥികൾക്കും അപേക്ഷിക്കാം.

Last Updated on 26 Aug 2026 • 2:48 PM by Openzone Online

ചെറുതോണി: ഇസ്രായേലിൽ വിവിധ മേഖലകളിലായി നിരവധി തൊഴിൽ അവസരങ്ങൾ റിപ്പോർട്ട് ചെയ്യുന്നു. ഓട്ടോമൊബൈൽ മേഖല മുതൽ CNC, VMC മെഷീൻ ഓപ്പറേഷൻ, കേബിൾ നിർമ്മാണം, മിനറൽ വാട്ടർ പ്ലാന്റ്, ഹെവി ഡ്രൈവിംഗ്, സൂപ്പർമാർക്കറ്റ് മേഖല എന്നിവയിലാണ് പുതിയ ഒഴിവുകൾ. സ്ത്രീകൾക്കും പുരുഷന്മാർക്കും വിവിധ തസ്തികകളിൽ അവസരമുണ്ട്.

ഓട്ടോമൊബൈൽ മേഖലയിൽ സ്പ്രേ പെയിന്റർ, ഡെന്റ് വർക്ക് തസ്തികകളിലായി 25 വീതം, ആകെ 50 ഒഴിവുകളാണ് റിപ്പോർട്ട് ചെയ്തിരിക്കുന്നത്. വാഹനങ്ങളുടെ ഡെന്റ് വർക്ക് അല്ലെങ്കിൽ സ്പ്രേ പെയിന്റിംഗ് മേഖലയിൽ പ്രവൃത്തിപരിചയവും അടിസ്ഥാന ഇംഗ്ലീഷ് പരിജ്ഞാനവും ആവശ്യമാണ്. 25 മുതൽ 40 വയസ് വരെയുള്ള പുരുഷന്മാർക്കാണ് ഈ ഒഴിവുകൾ. ഈ രണ്ട് തസ്തികകളിലേക്കും മുസ്ലിം ഉദ്യോഗാർഥികൾക്കും അപേക്ഷിക്കാം. ഒക്ടോബർ 13ന് നേരിട്ടുള്ള ക്ലയന്റ് ഇന്റർവ്യൂ നടക്കുമെന്നാണ് അറിയിച്ചിരിക്കുന്നത്.

CNC മെഷീൻ ഓപ്പറേറ്റർ, VMC മെഷീൻ ഓപ്പറേറ്റർ തസ്തികകളിൽ അഞ്ച് വീതം ഒഴിവുകളുണ്ട്. കുറഞ്ഞത് രണ്ട് വർഷത്തെ പ്രവൃത്തിപരിചയവും ഇംഗ്ലീഷ് സംസാരിക്കാനുള്ള കഴിവുമാണ് പ്രധാന യോഗ്യത. 25 മുതൽ 40 വയസ് വരെയുള്ള പുരുഷന്മാർക്ക് അപേക്ഷിക്കാം. ഈ വിഭാഗത്തിൽ അടിയന്തര നിയമനത്തിനായി ഫോൺ ഇന്റർവ്യൂ നടക്കും.

കേബിൾ നിർമ്മാണ കമ്പനിയിൽ ജനറൽ വർക്കർ തസ്തികയിൽ 40 ഒഴിവുകളാണ് റിപ്പോർട്ട് ചെയ്തിരിക്കുന്നത്. ഏതെങ്കിലും വ്യവസായം, ഫാക്ടറി, പ്രൊഡക്ഷൻ യൂണിറ്റ് തുടങ്ങിയ മേഖലകളിലെ പ്രവൃത്തിപരിചയം പരിഗണിക്കും. 25 മുതൽ 38 വയസ് വരെയുള്ള പുരുഷന്മാർക്ക് ഇംഗ്ലീഷ് ആശയവിനിമയശേഷിയോടെ അപേക്ഷിക്കാം.

മിനറൽ വാട്ടർ പ്ലാന്റ് ഓപ്പറേറ്റർ തസ്തികയിൽ 30 ഒഴിവുകളുണ്ട്. കുറഞ്ഞത് മൂന്ന് വർഷത്തെ പ്ലാന്റ് ഓപ്പറേറ്റർ പരിചയം, ഇംഗ്ലീഷ് ഭാഷാ പരിജ്ഞാനം എന്നിവയാണ് യോഗ്യത. 25 മുതൽ 40 വയസ് വരെയുള്ള പുരുഷന്മാർക്ക് അപേക്ഷിക്കാം. ഒക്ടോബർ 10നാണ് ഡയറക്ട് ക്ലയന്റ് ഇന്റർവ്യൂ നടത്താൻ നിശ്ചയിച്ചിരിക്കുന്നത്.

ഹെവി ഡ്രൈവർ തസ്തികയിൽ 50 ഒഴിവുകളും റിപ്പോർട്ട് ചെയ്തിട്ടുണ്ട്. GCC രാജ്യങ്ങളിലോ യൂറോപ്യൻ രാജ്യങ്ങളിലോ പ്രവൃത്തിപരിചയമുള്ള 30 മുതൽ 42 വയസ് വരെയുള്ള പുരുഷന്മാർക്ക് അപേക്ഷിക്കാം. അടിസ്ഥാന ഇംഗ്ലീഷ് പരിജ്ഞാനവും ആവശ്യമാണ്. CV തിരഞ്ഞെടുപ്പിന് ശേഷം ഏജൻസി ഇന്റർവ്യൂവും പ്രാക്ടിക്കൽ ടെസ്റ്റും ഉണ്ടാകും.

അതേസമയം, ഇസ്രായേലിലെ സൂപ്പർമാർക്കറ്റ് മേഖലയിൽ 150 ഒഴിവുകളാണ് റിപ്പോർട്ട് ചെയ്തിരിക്കുന്നത്. ഷെൽഫ് സോർട്ടർ, കാഷ്യർ, ക്ലീനിംഗ് തുടങ്ങിയ തസ്തികകളിലാണ് അവസരം. ഷെൽഫ് സോർട്ടർ തസ്തികയിൽ സ്ത്രീകൾക്കും പുരുഷന്മാർക്കും അവസരമുണ്ട്. കാഷ്യർ തസ്തികയിൽ സ്ത്രീകൾക്കും ക്ലീനിംഗ് വിഭാഗത്തിൽ പുരുഷന്മാർക്കുമാണ് ഒഴിവുകൾ. പ്രായപരിധി തസ്തിക അനുസരിച്ച് 30 മുതൽ 44 വയസ് വരെയാണ്. ഇംഗ്ലീഷ് ആശയവിനിമയശേഷി നിർബന്ധമാണെന്നും രണ്ട് ഘട്ടങ്ങളിലായി സൂം ഇന്റർവ്യൂ ഉണ്ടാകുമെന്നും അറിയിച്ചിട്ടുണ്ട്.

വിവിധ തസ്തികകളിലെ ഈ ഒഴിവുകളിൽ ₹1.60 ലക്ഷം മുതൽ ₹1.80 ലക്ഷം വരെയാണ് അടിസ്ഥാന ശമ്പളമായി അറിയിച്ചിരിക്കുന്നത്. താമസസൗകര്യവും മെഡിക്കൽ ഇൻഷുറൻസും ഉൾപ്പെടെയുള്ള ആനുകൂല്യങ്ങളും ലഭിക്കുമെന്ന് റിക്രൂട്ട്മെന്റ് വിവരങ്ങളിൽ പറയുന്നു.

ഇസ്രായേലിൽ സാധാരണയായി എട്ട് മുതൽ ഒൻപത് മണിക്കൂർ വരെയുള്ള ജോലി സമയത്തിന് ലഭിക്കുന്ന അടിസ്ഥാന ശമ്പളം ഇന്ത്യൻ രൂപയിൽ ഏകദേശം രണ്ട് ലക്ഷത്തോട് അടുത്തെത്തുന്ന നിലയിലാണെന്നും, ഓവർടൈം ഉൾപ്പെടെ മൂന്ന് ലക്ഷത്തിലധികം രൂപ വരെ നാട്ടിലേക്ക് അയക്കുന്ന തൊഴിലാളികളുമുണ്ടെന്നുമാണ് ഈ മേഖലയുമായി ബന്ധപ്പെട്ട് ലഭിക്കുന്ന വിവരങ്ങൾ. എന്നാൽ യഥാർഥ ശമ്പളവും ഓവർടൈം വരുമാനവും ജോലി, കരാർ, ജോലി സമയം, നിയമപരമായ കുറവുകൾ തുടങ്ങിയവ അനുസരിച്ച് വ്യത്യാസപ്പെടാം.

ഇസ്രായേലിൽ അടുത്തിടെ ഇന്ത്യയിൽ നിന്ന് വിവിധ മേഖലകളിലേക്ക് തൊഴിലാളികൾ എത്തി ജോലിയിൽ പ്രവേശിച്ചിട്ടുണ്ടെന്നും, പുതിയ റിക്രൂട്ട്മെന്റുകൾക്ക് വിവിധ വിഭാഗങ്ങളിലായി അവസരങ്ങൾ തുറന്നിട്ടുണ്ടെന്നും ബന്ധപ്പെട്ട വിവരങ്ങളിൽ പറയുന്നു.