Last Updated on 07 May 2026 • 7:58 AM by Openzone Online
ഒരുകാലത്ത് ഇന്ത്യയിലെ ഏറ്റവും ശക്തമായ രാഷ്ട്രീയ പാർട്ടിയായിരുന്നു കോൺഗ്രസ്. വെസ്റ്റ് ബംഗാൾ മുതൽ ഉത്തർപ്രദേശ് വരെ രാജ്യത്തിന്റെ രാഷ്ട്രീയ ദിശ നിർണയിച്ചിരുന്ന പാർട്ടി. എന്നാൽ ഇന്ന് ആ സംസ്ഥാനങ്ങളിലെ രാഷ്ട്രീയ ഭൂപടം നോക്കുമ്പോൾ കോൺഗ്രസിന്റെ പതനം ഇന്ത്യൻ രാഷ്ട്രീയത്തിലെ ഏറ്റവും വലിയ മുന്നറിയിപ്പുകളിലൊന്നായി മാറിയിരിക്കുകയാണ്. പശ്ചിമ ബംഗാളിൽ സിദ്ധാർഥ ശങ്കർ റേ കാലത്ത് അധികാരത്തിന്റെ ഉച്ചിയിൽ നിന്നിരുന്ന കോൺഗ്രസ് പിന്നീട് ഇടതുപക്ഷത്തിന്റെ ഉയർച്ചയ്ക്കും തുടർന്ന് മമതാ ബാനർജിയുടെ തൃണമൂൽ തരംഗത്തിനുമുന്നിൽ തകർന്നു വീണു. ഇന്ന് ഒരുകാലത്ത് സംസ്ഥാനം ഭരിച്ച പാർട്ടിക്ക് അവിടെ വളരെ ചെറിയ സാന്നിധ്യം മാത്രമാണ് ബാക്കിയുള്ളത്. ഉത്തർപ്രദേശിലെ അവസ്ഥ അതിലും വേദനാജനകമാണ്. ഇന്ത്യയിലെ പ്രധാനമന്ത്രിമാരെ വരെ നിർണയിച്ചിരുന്ന കോൺഗ്രസ് പിന്നീട് ജാതി രാഷ്ട്രീയത്തിനും പ്രാദേശിക പാർട്ടികളുടെ വളർച്ചയ്ക്കും മുന്നിൽ അടിത്തറ നഷ്ടപ്പെടുത്തി. സമാജുവാദി പാർട്ടിയും ബഹുജൻ സമാജ് വാദി പാർട്ടിയും വളർന്നപ്പോൾ കോൺഗ്രസിന് വോട്ട് ബാങ്ക് പോലും നിലനിർത്താൻ കഴിഞ്ഞില്ല. പിന്നീട് ഭാരതീയ ജനതാ പാർട്ടി യു.പിയെ പൂർണമായി കൈവശപ്പെടുത്തി.
തമിഴ്നാട്ടിൽ കെ. കാമരാജ് എന്ന അതികായ നേതാവിന്റെ പാർട്ടി പിന്നീട് ദ്രാവിഡ രാഷ്ട്രീയത്തിന്റെ മുന്നിൽ പൂർണമായി പിന്നോട്ടുപോയി. ഒരുകാലത്ത് തമിഴ്നാട് ഭരിച്ച കോൺഗ്രസ് ഇന്ന് അവിടെ കൂട്ടുകക്ഷിയില്ലാതെ നിലനിൽക്കാൻ പോലും പ്രയാസപ്പെടുന്ന അവസ്ഥയിലാണ്.ത്രിപുരയിലും സമാനമായ കഥ തന്നെയായിരുന്നു. കോൺഗ്രസിന്റെ ഇടിവും സംഘടനാ തകർച്ചയും പിന്നീട് ഇടതുപക്ഷത്തിനും തുടർന്ന് ബിജെപിക്കും രാഷ്ട്രീയ വളർച്ചയ്ക്ക് വഴി തുറന്നു. ഒരിക്കൽ രാജ്യം മുഴുവൻ നിയന്ത്രിച്ചിരുന്ന പാർട്ടിക്ക് ഇന്ന് പല സംസ്ഥാനങ്ങളിലും സാന്നിധ്യം പോലും നഷ്ടമായത് രാഷ്ട്രീയ ചരിത്രത്തിലെ വലിയ പാഠമായി മാറിയിരിക്കുകയാണ്. ഈ ചരിത്രങ്ങൾ വീണ്ടും ചർച്ചയാകുന്നത് കേരളത്തിലെ പുതിയ രാഷ്ട്രീയ സാഹചര്യത്തിന്റെ പശ്ചാത്തലത്തിലാണ്. യു.ഡി.എഫ് അധികാരത്തിലെത്തിയതിന് പിന്നാലെ ചില കോൺഗ്രസ് പ്രവർത്തകർ സോഷ്യൽ മീഡിയയിൽ പങ്കുവെക്കുന്ന വിജയാഘോഷ പോസ്റ്റുകളാണ് ഇപ്പോൾ വിമർശനങ്ങൾക്ക് ഇടയാക്കുന്നത്. കേരളം ഭരിക്കുന്നത് യു.ഡി.എഫ്, എന്ന തരത്തിലുള്ള പോസ്റ്റുകളും എതിരാളികളെ പരിഹസിക്കുന്ന സന്ദേശങ്ങളും വ്യാപകമായി പ്രചരിക്കുന്നുണ്ട്. സോഷ്യൽ മീഡിയയിൽ മുൻപ് സൈബർ സഖാക്കൾ ക്കെതിരെ ഉയർന്നിരുന്ന വിമർശനങ്ങൾ ഇപ്പോൾ കോൺഗ്രസ് സൈബർ ഗ്രൂപ്പുകൾക്കുമേൽ തന്നെ ഉയരുന്നുവെന്നാണ് രാഷ്ട്രീയ നിരീക്ഷകരുടെ അഭിപ്രായം.
വിജയത്തിന്റെ ആവേശത്തിൽ എതിരാളികളെ അധിക്ഷേപിക്കുകയും, ഇനി കേരളം ഞങ്ങളുടേത് എന്ന തരത്തിലുള്ള ഭാഷ ഉപയോഗിക്കുകയും ചെയ്യുന്നത് സാധാരണ ജനങ്ങളിൽ പോലും അസ്വസ്ഥത സൃഷ്ടിക്കുമെന്നാണ് വിലയിരുത്തൽ. ഭരണം ആരംഭിക്കുന്നതിന് മുമ്പേ അഹങ്കാര രാഷ്ട്രീയത്തിന്റെ സൂചനകൾ പുറത്തുവരുന്നത് കോൺഗ്രസിനുതന്നെ അപകടകരമായ സന്ദേശമാണെന്നാണ് വിമർശകർ പറയുന്നത്. ആറുമാസമെങ്കിലും വലിയ വിവാദങ്ങളോ പ്രശ്നങ്ങളോ ഇല്ലാതെ ഭരിച്ച് കാണിച്ചിട്ട് ആഘോഷിക്കുന്നതല്ലേ നല്ലത് ? എന്ന ചോദ്യവും സോഷ്യൽ മീഡിയയിൽ ഉയരുന്നുണ്ട്. ഇന്ത്യൻ രാഷ്ട്രീയ ചരിത്രം വീണ്ടും വീണ്ടും തെളിയിച്ച ഒരു കാര്യമുണ്ട് — ജനങ്ങൾ അധികാരം നൽകും, പക്ഷേ അഹങ്കാരം സഹിക്കില്ല. പശ്ചിമ ബംഗാളിലും തമിഴ്നാട്ടിലും ഉത്തർപ്രദേശിലും സംഭവിച്ചതെല്ലാം അതിന്റെ ഉദാഹരണങ്ങളാണ്. അതുകൊണ്ടുതന്നെ കേരളത്തിലെ കോൺഗ്രസ് നേതൃത്വവും അണികളും വിജയത്തിന്റെ ലഹരിയേക്കാൾ ഭരണത്തിന്റെ ഉത്തരവാദിത്തത്തിനാണ് മുൻഗണന നൽകേണ്ടതെന്ന മുന്നറിയിപ്പാണ് ഇപ്പോൾ ഉയരുന്നത്.
